... og ekki hefur ástandið skánað ...

sbr. síðustu færslu mína fyrir nærri 6 vikum síðan. Ekki minnkar tuðið og kvartanirnar undan vinnubrögðum sem sömu mönnum þóttu sjálfsögð fyrir 2 mánuðum síðan. Þetta kalla menn sennilega ábyrga og málefnalega stjórnarandstöðu sbr. söng ÁJ í dag.

Ég veit ekki hvort þessi sandkassahegðun á eftir að skila fleiri eða færri atkvæðum merktum x-D, en ekkert kemur manni svo sem á óvart í þeim efnum. Á meðan hefur umræðan um afnám verðtryggingar því miður því sem næst sofnað eina ferðina enn. Bjarni Ben fær reyndar prik frá mér fyrir að tala beint út um að það eigi að byrja að leita leiða til afnáms verðtryggingarinnar strax í vor. Þegar vinnan hefst, þá munu lausnirnar koma. Þar er ég sammála honum. Verst að hann hefur að öllum líkindum ekki flokkinn með sér í þessari skoðun. Aðrir hafa talað um að færa til baka vísitölu og aftengja hana tímabundið, en ég gef lítið fyrir slíkar hugmyndir. VERÐTRYGGINGU Á AÐ AFNEMA STRAX AF FRAMTÍÐARFJÁRMÁLAGJÖRNINGUM, nú er tækifærið, eins og ég hef áður bent á. Það rennur okkur hins vegar úr greipum ef ekki er hamrað járnið. Enn koma þó fram álitsgjafar eins og Edda Rós (Markaðsstjóri einhvers bankans, nei, sorrí, greiningar- eitthvað) og slengja enn og aftur fram bábiljuhræðsluáróðrinum um hvort við viljum hverfa aftur til áttunda áratugarins og horfa á sparifé okkar og lífeyrissjóði brenna upp í verðbólgunni. Sér fólk og fréttamenn ekki enn í gegnum þetta? Hver hefur farið fram á að íbúðalán verði veitt á 2ja prósenta föstum vöxtum út lánstímann, óháð verðbólgu og almennu vaxtastigi? Hver? Lesið eldri færslur mínar um verðtrygginguna ef þið eruð til í að horfa á þetta út frá öðrum sjónarhóli.

Ég er kominn í algera bloggleti og ég sé ekki fram á neinar breytingar á nokkrum hlut með kosningunum síðar í þessum mánuði, nema þá helst ef nógu margir eru til í að skoða þann valkost að kjósa ný framboð. Ég á eftir að kynna mér betur þau málefni sem þar er boðið upp á, en ég hyggst gera það áður en ég geri upp minn hug. Hvet aðra til að gera það sama með opnum huga.

Nóg um það, blogga ábyggilega ekki meira næsta mánuðinn. Vildi bara skella inn nokkrum orðum til að bloggið lokist ekki vegna notkunarleysis :-)

Góðar stundir.

 

Athugasemdir

[Páll A. Þorgeirsson (IP-tala skráð) 8.4.2009 kl. 23:00]

Tek undir með þér AFNEMUM VERÐTRYGGINGU.

Auðvitað er ósköp þægilegt fyrir Eddu Rós og aðra bankasnillinga að fá  sjálfvirkar vísitöluhækkanir á silfurfati í viðbót við vexti, verðbætur á vexti og ég veit ekki hvað og hvað....... og láta viðskiptavininn taka alla áhættuna.  Þannig geta allir rekið banka og grætt vel.  Þetta stórkostlega afrek pólitíkusa sem kallast verðtrygging var einmitt sett á vegna þess að pólitíkusar á þeim tíma kunnu ekki önnur ráð við verðbólgu og fjármálasnillingar í sjóðum og bönkum fögnuðu margir hverjir vel, sennilega ekki gert sér grein fyrir því fyrr en þá að til að ná ávöxtun á sjóðinn þurfa vextir að vera umfram verðbólgu     Nú gat þetta lið slakað á því allt var orðið sjálfvirkt og lítið sem ekkert gat klikkað.  Auðvitað var þessi snjalla vísitöluhækkun líka á launum og auðvitað var það hárrétt og í takt við önnur "eðlileg" vinnubrögð þess tíma.   

Örfáum árum eftir upphaf verðtryggingar komust "fjármálasnillingar" að því að þessi "sjálfvirka seðlaprentun" gengi sennilega ekki upp og kerfið færi brátt að setja fyrirtæki á höfuðið ef þetta gengi mikið lengur.  Þeir redduðu þeim vandamálum afar smekklega og töldu fólki trú um að ekki væri hægt að ætlast til þess að laun hækkuðu þó svo bananar, kaffi eða eitthvað annað erlent góðgæti hækkaði í verði.  Ekki væri hægt að hækka launin vegna þess það væri ekki nein "verðmætasköpun" sem stæði á bak við þá hækkun.  Þeir afnámu vísitölu launa.  Auðvitað héldu þeir lánskjaravísitölunni, sú seðlaprentun hélt áfram og varð í raun ennþá ógeðfelldara skrímsli en hún hafði verið.  Verðtrygging er fyrst og fremst sönnun þess að við höfum fullkomlega vanhæfa stjórnendur í peningamálum þjóðarinnar.  Þeir hafa ekki getu til að takast á við verðbólgu eins og flestar aðrar þjóðir geta gert, jafnvel bananalýðveldi hafa ekki haft þessa "fáránlegu lausn" í baráttu við verðbólgu sem við gerum.  Og hvaða rök eru fyrir því að vísitöluhækkanir hafi bara áhrif á krónurnar á bankabókum okkar og lánum en ekki á þær krónur sem við fáum í launaumslagið,  það eru þó þær krónur sem við þörfnumst mest til að lifa af í þessu blessaða landi.     Sjálfur Seðlabankinn hefur ekki nein tök á þessu "sjálfvirka seðlaprentunarkerfi" sem verðtrygging er, hún er hafin yfir alla stjórn peningamála.  Þvílíkur skrípaleikur.